Partia Demokratike e Kosovës doli fituese në Prizren dhe Lipjan, ku u votua të dielën, në bazë të rezultateve jo-përfundimtare të shpallura nga Komisioni Qendror i Zgjedhjeve. Në Prizren, kandidati i PDK-së, Ramadan Muja, arriti të marrë 30 mijë e 151 vota apo 53.2 përqind, kundrejt atij të LDK-së, Hanefi Muharremi, që grumbulloi 26 mijë e 493 vota, apo 46.8 përqind të totalit të tyre. Edhe në Lipjan kandidati i PDK-së, Shukri Buja doli i pari me 53.7 përqind që bëjnë 14 mijë e 209 vota, përballë Imri Ahmetit të LDK-së, me 46.3 përqind, apo 12 mijë e 261 vota. Këto rezultate KQZ-ja i publikoi në orën e parë të ditës së hënës. Kurse, rezultati final pritet të dihet pas numërimit të votave me kusht nga të dyja komunat, që do të bëhet në Qendrën e Numërimit dhe Rezultateve. Në Prizren pjesëmarrja ishte nën 50 përqind, saktësisht 43.3. Ndërsa në Lipjan votuan më shumë së gjysma e qytetarëve me të drejtë vote, gjithsejtë 57.1 përqind.
Komisioni Qendror i Zgjedhjeve e ka vlerësuar si pozitiv përseritjen e raundit të dytë në këto dy komuna, meqë nuk ka pasur incidente që do ta dëmtonin imazhin e këtij procesi.

< Paraprake		Pasuese >