Vetëm dy incidente të lehta janë shënuar gjatë votimeve të së dielës në komunën e Lipjanit, ndërsa në Prizren nuk është raportuar as për më të voglin incident, thonë zyrtarë të policisë e Kosovës. Zëdhënësi I këtij institucioni Baki Kelani, tha se incidenti I parë është shënuar në fshatin Babush të Muhaxherëve, ku dy persona janë konfliktuar në mes vete. Bëhet e ditur se njëri nga ta kanosi personin tjetër brenda oborrit të shkollës, ku ishte e vendosur qendra e votimit, por pas intervenimit të policisë dhe deklaratave të tyre, që të dy janë liruar. Rasti tjetër ndodhi në fshatin Gadime, ku një person shtiu me armë zjarri, por që sipas Kelanit nuk kishte të bënte fare me zgjedhjet. Në përgjithësi policia vlerëson se dita e djeshme ishte e qetë, dhe nuk mund të thuhet se pati probleme që do të prishnin imazhin zgjedhor.

< Paraprake		Pasuese >