Partia Demokratike e Kosovës, pretendon të jetë fituese e raundit të tretë zgjedhor në dy komunat që shkuan në rivotim sot. Pas mbylljes së procesit, në Prizren dhe Lipjan, PDK-ja sipas rezultateve që i paraqiti medieve, thotë të ketë fituar bindshëm me kandidatët e saj, dhe atë në të dy komunat. Rivalja e saj në këtë garë, Lidhja Demokratike e Kosovës, ende nuk ka reaguar ndaj shpalljes së fitores nga Ramadan Muja në Prizren dhe Shukri Buja në Lypjan. Në këto dy qytete, tashmë veç ka filluar festa e simpatizantëve të PDK-së. Situata paraqitet të jetë e qetë, ndërsa nuk është raportuar ende asnjë incident, apo që është dashur ndërhyrja e forcave të rendit. Fitoren e PDK-sw e ka konfirmuar edhe koalicioni i OJQ-ve “Demokracia në Veprim”. Sipas koalicionit “Demokracia në Veprim”, në Prizren ka fituar Ramadan Muja i PDK-së me 53.1 % të votave, ndërsa kundërkandidati i tij nga LDK, Hanefi Muharremi ka fituar 46.9 % të votave.
Ndërsa në Lipjan, kandidati i PDK-së, Shukri Buja, ka marrë 53.6 % të votave, ndërsa ai i LDK-së, Imri Ahmeti, 46.4 %.

< Paraprake		Pasuese >