Radio Televizioni i Kosovës nuk bënë të financohet në asnjë mënyrë nga buxheti i shtetit. Kështu shkruan Asociacioni i Gazetarëve Profesionistë të Kosovës në një komunikatë për media. Sipas këtij asociacioni “futja e RTK-së nën buxhetin e shtetit, pavarësisht që është e përkohshme, është shumë e rrezikshme për pavarësinë editoriale të mediumit. Madje AGKP vlerëson se në seancën e së enjtes të Kuvendit u vërejt se ekziston një konsensus i të gjitha subjekteve politike për ta shndërruar mediumin e vetëm publik, në medium shtetëror. Në vend se ta bënin këtë, deputetët kanë mundur ta amandamentojnë Ligjin për RTK-në, dhe të rregullojnë mënyrën e përhershme të financimit nëpërmjet parapagimit. Ndërsa, në anën tjetër shefi i ICO-së, Pieter Feith, lavdëroi vendimin e djeshëm të Kuvendit të Kosovës për financimin afatshkurtër të RTK-së derisa autoritetet përkatëse gjatë periudhës së ardhshme tremujore të hartojnë opsionet për sigurimin e qëndrueshmërisë afatgjatë të RTK-së. “Unë e mbështesë plotësisht këtë vendim dhe jam i kënaqëur që Qeveria do ta zbatojë atë”, thuhet në komunikatën e shefit të ICO-së dhe njëherit përfaqësues special i BE-së, Pieter Feith.

< Paraprake		Pasuese >