Mandati i Përfaqësuesit Ndërkombëtar Civil në Kosovë do të rishikohet më 8 shkurt në Vjenë. Kjo gjë pritet të bëhet në takimin e radhës të Grupi Ndërkombëtar Drejtues ku marrin pjesë drejtorët për Ballkanin nga 25 shtete pjesëmarrëse. Siç shkruan sot, e përditshmja Express, shefit të ICO-s, Pieter Feith, që llogaritet edhe si ndërkombëtari me më së shumti pushtet në Kosovë, pritet t’i zvogëlohen disa nga përgjegjësitë ekzekutive në fushat ku është zbatuar Plani i Ahtisaarit, por kjo do të bëhet vetëm nëse ai pajtohet. Sipas burimeve të gazetës, në takimin e Vjenës do të arrihet pajtimi për shkurtim të vogël të kompetencave ekzekutive të Pieter Feithit, të cilat konsultime kanë filluar para disa muajsh. Në takimin e radhës të Grupit Ndërkombëtar Drejtues, do të diskutohet edhe rreth Strategjisë për vendosjen e ligjshmërisë në veri të Kosovës. Diplomatët ndërkombëtarë, sipas Express, pritet t’i japin mbështetje këtij plani të hartuar nga institucionet kosovare dhe Zyra Ndërkombëtare Civile.

< Paraprake		Pasuese >