Dardanët nuk ndalen vetëm me akuzat për titizëm ndaj Lidhjes Demokratike të Kosovës. Ata të mërkurën akuzuan presidentin e Kosovës, Fatmir Sejdiun, për abuzim me pozitën e tij zyrtare në favor të partisë së tij. Sipas antarit të kryesisë në LDD Sejd Tolaj, presidenti me vite është duke e shkelur kushtetutën e Kosovës. Tolaj i bëri thirrje Sejdiut t’i ndërpresë këto metoda joligjore përndryshe LDD-ja nuk do të rrijë duarkryq. Presidenca i vlerëson këto akuza jo serioze dhe për keqardhje.
Zëdhënësi i presidentit Sejdiun, Xhavit Beqiri, tha se akuzat e LDD-së janë të pavërteta. Tolaj e akuzoi LDK-në dhe zyrtarët e saj edhe për largimin nga puna dhe kërcënimin e vazhdueshëm të anëtarëve dhe simpatizantëve të LDD-së, si në nivel qendror ashtu edhe në atë lokal. Ky zyrtar i lartë dardan, i quajti manipulim me opinionin publik pohimet për kalimin e degës së LDD-së së Kaçanikut në AAK. Ai tha se dega e këtij subjekti në Kaçanik, është funksionale dhe përfaqësohet edhe në asamblenë komunale.

< Paraprake		Pasuese >