Kryesia e Kuvendit të Kosovës ka vendosur që t’i parashtrojë Qeverisë së Kosovës kërkesën e Grupit Parlamentar të LDD-së për t’u informuar në lidhje me nivelin e zbatimit të Kushtetutshmërisë në të gjithë teritorin e Kosovës. Kryeparlamentari Jakup Krasniqi ka thënë se pas dy javësh presin të marrin një informatë për hapat që po ndërmerr qeveria për të larguar strukturat paralele nga Kosova e më pas mbi bazën e këtyre të zhvillohet një debat në Kuvend. Opozita ka kritikuar Qeverinë për anashkalim të Kuvendit sa i përket diskutimit dhe hartimit të kësaj strategjie. Shefi i Grupit Parlamentar të Aleancës Kosova e Re, Ibrahim Makolli, ka thënë se Kuvendi nuk është informuar për këtë strategji dhe kjo, sipas tij, flet për mosseriozitetin e institucioneve të vendit për një çështje të tillë e cila është e vështirë të zgjidhet. Ndërsa propozuesi i debatit për zbatueshmërinë e kushtetutës në tërë territorin, Lulzim Zeneli ka theksuar se pas periudhës dyjavore Qeveria do të ketë kohë që të sjellë informatën, e Kuvendi sipas tij do të debatojë dhe do të nxjerrë rekomandime obliguese për Qeverinë.

< Paraprake		Pasuese >