Kryeministri Hashim Thaçi dhe shefi i EULEX-it Iv de Kermabon, paralajmëruan të hënën veprime energjike të organeve të drejtësisë pas publikimit të akuzave për vrasje të porositura nga SHIK-u.
Kreu i ekzekutivit kosovar rrethanat e krijuara pas këtyre akuzave i vlerësoi si cenim të rendit kushtetues dhe sigurisë nacionale.
Ndërkaq, shefi i EULEXit, pohoi se me kryeministrin janë dakorduar për rëndësinë e sundimit të ligjit. Në këtë fushë, ai u premtoi kosovarëve përkrahjen e fuqishme të misionit evropian.
Ndërkaq presidenti Kosovës, Fatmir Sejdiu, kërkoi sot nga institucionet e drejtësisë që të ndërmarrin të gjitha veprimet e nevojshme për të ndriçuar të gjitha krimet e bëra në Kosovë dhe për dënimin e autorëve të tyre.
Presidenti thërret të gjithë qytetarët të ruajnë qetësinë dhe të kontribuojnë në stabilitetin e vendit, duke mbështetur institucionet vendase dhe ato ndërkombëtare të drejtësisë, në zbardhjen e të gjitha rasteve të pandriçuara, si dhe për sjelljen e autorëve të tyre para drejtësisë.

< Paraprake		Pasuese >