– Lëvizja FOL ka publikuar sot, Raportin e saj ‘Monitoruesi i Korrupsionit’, në të cilin përfshihen të gjitha aktivitetet e ndërmarra institucionale në luftë kundër korrupsionit për periudhën gjashtë-mujore: janar-qershor 2012.
Sipas të gjeturave të këtij Raporti rezulton se “shtrirja më e madhe gjeografike e korrupsionit është në Prishtinë - me 50 akte akuzuese të ngritura nga prokuroritë e vendit; pason Peja me 19 akte akuzuese; Gjilani me 10; Prizreni me 7; Ferizaj me 8; si dhe Gjakova me 4 akte akuzuese.
Ndërkaq, prokuroritë që nuk kanë shënuar rezultat në luftë kundër korrupsionit janë: prokuroria e qarkut dhe ajo komunale në Mitrovicë, si dhe Prokuroria Speciale e Republikës së Kosovës, të cilat në gjashtëmujorin e parë të këtij viti nuk kanë ngritur as edhe një akt akuzues të vetëm. Sipas Raportit as Kuvendi i Kosovës nuk është treguar produktiv në parandalimin dhe luftimin e korrupsionit. Nga 29 seanca plenare sa janë mbajtur gjithsej, vetëm në dy prej tyre është diskutuar për luftën “kundër” korrupsion: a) Strategjinë Kundër Korrupsion dhe Planin e Veprimit 2012-2016 dhe b) Raporti Vjetor i Agjencisë Kundër Korrupsion (2011). Pa marrë parasysh diskutimet e bëra në këto dy seanca, ato nuk kanë pasur kurrfarë ndikimi në uljen e nivelit të lartë të korrupsionit në vend.

< Paraprake		Pasuese >