Kanë nisur hetimet për akuzat e Dick Martyt. Task Forca për Hetime Speciale që udhëhiqet nga prokurori amerikan Clint Williamson ka kompletuar stafin, këtë të premte. Prokurori dhe ekipi i tij janë kthyer nga vizitat që kanë pasur në Kosovë, Serbi e Shqipëri. Nëpërmjet hetuesve po i marrin informacionet institucionale të përmendura në raportin e senatorit zviceran, Dick Marty. Informacionet po analizohen dhe në këtë mënyrë do të hartohet strategjia në bazë të së cilës do të kryhet hetimi. Sipas zëdhënësit të Task Forcës, Juri Laas, ka qenë me rëndësi që në fillim të garantohet mbështetja e nivelit të lartë politik në Prishtinë, Beograd dhe Tiranë. “Task Forca tash është në proces të sigurimit, analizimit dhe kryerjes së disa hetimeve. Të gjitha do të krijojnë strategjinë prokuroriale”, ka thënë Laas.

< Paraprake		Pasuese >