Zëvendëskryeministrja e Republikës së Kosovës, Edita Tahiri, ka pritur në një takim përfaqësuesit politik nga Lugina e Preshevës në përbërje të të cilit ishin, Riza Halimi, deputet në parlamentin e Serbisë; Galip Beqiri, Kryetar i Këshillit Kombëtar të shqiptarëve dhe Shaip Kamberi, kryetar i Komunës së Bujanocit.
Tahiri duke shprehur shqetësimin për gjendjen jo të mirë të shqiptarëve në Luginë, premtoi angazhimin maksimal të Qeverisë së Republikës së Kosovës në mbështetje të drejtave etnike të shqiptarëve, si dhe për ruajtjen e identitetit etnik dhe kulturor në trojet e tyre etnike.
Duke folur për procesin e dialogut teknik në Bruksel, Tahiri tha se dialogu ka për qëllim zgjidhjen e çështjeve teknike mes dy shteteve fqinje, Kosovës dhe Serbisë, dhe marrëveshjet e arritura deri tash janë me efekte pozitive edhe për shqiptarët e Luginës së Preshevës, sepse sipas saj sigurojnë lëvizjen reciproke të njerëzve dhe mallrave.

< Paraprake		Pasuese >