Kompania që ka marrë përsipër organizimin e koncertit të këngëtarit italian, Eros Ramazzoti në Prishtinë, ka deklaruar se koncerti do të mbahet më 9 gusht në stadiumin e kryeqytetit të Kosovës.

Zyrtarë të kompanisë “UBBOSS”, kanë njoftuar këtë lajm përmes një komunikate, ndërkohë që ende nuk është bërë zyrtarizimi nga vet këngëtari.

Menaxherja e kompanisë “UBBOSS”, Armelda Filipaj ka thënë se gjithçka është rregulluar dhe është rënë dakord për datën e re.

Sipas saj, ministri Lutfi Haziri i ka dhënë garanci se do ta mbështesë këtë koncert, duke dhënë pagesën prej 15 mijë eurosh për qiranë e stadiumit të Prishtinës.

"Ministri na ka dhënë garanci dhe ne të hënën do të shkojmë në stadiumin e Prishtinës, që me menaxherin të nënshkruajmë një kontratë, ku do t'i marrim përsipër të gjitha dëmet që do të bëhen gjatë mbajtjes së koncertit", ka thënë Filipaj.

Shtyrja e koncertit, që do të duhej të mbahej më 30 korrik, u bë pas kërkesave të drejtuesve të stadiumit për garanci pasurore për dëmet që mund të shkaktoheshin, të cilën kontratë nuk e kishte nënshkruar kompania që do ta sjellë Ramazzotin në Prishtinë.


 

< Paraprake		Pasuese >