Drejtoresha e Fondit për të Drejtën Humanitare, Natasha Kandiq doli me dokumente të reja nga Gjykata e Hagës, që dëshmojnë për krime të rënda lufte të kryera nga Ljubisa Dikoviq – shef i armatës serbe. Kandiq, ka thënë për Radion Evropa e Lirë, se dokumentet nga baza e të dhënave të Gjykatës së Hagës, tregojnë për shumë krime të rënda lufte dhe masive ndaj civilëve shqiptarë në Drenicë, në zonën e përgjegjësisë së Dikoviqit.
Por këto akuza e kanë nevrikosur ministrin serb të mbrojtjes, Dragan Shutanovac, i cili mohoi në tërësi ato që u thanë për shefin e ushtrisë të emëruar muajin e kaluar. Sipas ministrit Shutanovac, "para se gjenerali Dikoviq të emërohej në këtë post janë kryer të gjitha verifikimet për punën e tij në të kaluarën. Ai nuk ka qenë në postet për të cilat akuzohet", ka shtuar Shutanovac. Fondi për të drejtën humanitare ka kërkuar nëpërmjet një kumtese që gjenerali Dikoviq të shkarkohet nga posti i shefit të armatës serbe.
E Shutanovac, për këto pretendime që i ka cilësuar si gënjështra, ka thënë se pret reagimin e autoriteteve përgjegjëse.

< Paraprake		Pasuese >