Pas një seance maratonike, dhe 17 orëve debat, parlamenti shqiptar, miratoi projekt-buxhetin për vitin 2011. Me 74 vota pro dhe një kundër, draft-buxheti mori vetëm votat e demokratëve, ndërsa opozita ishte e pranishme por nuk votoi. Ky është buxheti i dytë, të cilin socialistët nuk e votojnë. Seanca plenare u shqua nga debate dhe akuza të ashpra mes palëve. Demokratët mbrojtën buxhetin duke vlerësuar investimet në infrastrukturë, arsim dhe shëndetësi, ndërsa opozita e kundërshtoi duke e cilësuar jo real buxhetin, dhe të paraqitur me shifra të fryra nga qeveria. Sipas socialistëve, deficiti buxhetor dhe borxhi publik, si dy tregues kanë arritur nivele alarmante. Buxheti 2011 i Shqipërisë ka një vlerë prej 409 miliardë lekë, apo 3 miliard Euro. Ai parashikon rritje ekonomike 5.5 për qind vitin e ardhshëm dhe një inflacion prej 3 për qind. Deficiti buxhetor planifikohet 3.5 për qind dhe borxhi publik në 59 për qind të Produktit të Brendshëm Bruto.

< Paraprake		Pasuese >