Sretko Kalinic, antari i grupit kriminal të Zemunit, u ekstradua në Serbi në orët e hershme të së mërkurës duke u dërguar në burgun e gjykatës speciale të Beogradit.

Ky është ekstradimi i parë i një qytetari kroat pas nënshkrimit të një marrëveshje për ekstradimin ndërshtetëror.

Kalinic u transferua nga burgu Zagrebit në Dubravë për në Beograd në sajë të planit të qeverisë së Serbisë. Operacioni i ekstradimit u mbikëqyr nga njësitet anti-terroriste i Ministrisë së Punëve të Brendshme të Serbisë.

Kalinic është gjykuar në mungesë dhe i është shqiptuar dënimi prej 30 vitesh burg për pjesëmarrje në vrasjen e kryeministrit serb Zoran Xhinxhiq dhe me 40 vite të tjera për vrasjen e 19 personave, rrëmbimin e tre të tjerëve dhe organizimin e dy aksioneve terroriste.

Kalinic ka lindur në jug të Kroacisë në vitin 1974 dhe ka mbajtur dy shtetësi atë serbe dhe atë kroate. Ai është njohur si vrasësi më i pamëshirshëm i grupit kriminal të Zemunit, pasi u takua me Dusan Spasojevic dhe Mile Lukovic, liderët e fundit të grupit, gjatë konfliktit të armatosur në Kosovë më 1999.

Pasi ishte i lirë për disa vite, që nga vrasja e Xhinxhiqit më 12 Mars 2003, ai u kap në Zagreb më 8 Qershor, pasi u qëllua nga një tjetër antar i grupit famkeq, Milos Simoviç. Të martën, Kalinicit iu shqiptuan edhe 18 muaj burgim, për falsifikim të pasaportës.


 

< Paraprake		Pasuese >