Autoritetet meksikane neutralizuan liderin e kartelit të fuqishëm të narkotikëve Sinaloa. Baroni i drogës Ignacio “Nacho” Coronel u vra mbrëmë nga ushtria e këtij vendi.
Presidenti meksikan Felipe Calderon pati një arsye të mirë për të festuar. Lajmi u bë i ditur nga zyrtarët e policisë meksikane, të cilët të mërkurën njoftuan se Coronel u vra gjatë një përleshje të armatosur, tek sa po i rezistonte arrestimit në afërsi të Guadalaharas. Sipas gazetës meksikane Reforma, bosi i narkotikëve kishte luftuar me njësite të ushtrisë meksikane. Për dilerin famëkeq të drogës, vite me radhë ishte vënë në kërkim edhe FBI-ja. Ai llogaritej si njeriu më me ndikim në nëntokën meksikane, pas Joaquin Shorty Guzman, liderit të grupeve të narkotikëve, për të cilin ekziston nofka e më të kërkuarit në Meksikë dhe më gjerë. Vrasja e Coronelit pritet t’i jep një kurajo të fuqishme presidentit meksikan Calderon, i cili që nga viti 2006, haptas i ka shpallur luftë trafikuesve të drogës. Vetëm në tre vitet e kaluara në Meksikë kanë vdekur më shumë se 26 mijë persona, si pasojë e sherrit ndërmjet bandave të drogës.
 

< Paraprake		Pasuese >