Kolegji i komisioneve për liberalizimin e vizave, ka vendosur të liberalizojë vizat për Shqipërinë dhe Bosnje Hercegovinën. Lajmi është konfirmuar nga Komisionerja për Çështjet e Drejtësisë në Parlamentin Evropian, Cecilia Malstrom.

Sipas saj ky propozim patjetër sjell lajme të mira për Shqipërinë dhe Bosnjën dhe natyrisht është pjesë shumë e rëndësishme e politikës së Bashkimit Evropian për të lehtësuar kontaktet mes njerëzve.

“Është gjithashtu një mundësi komunikimi midis vendeve”, ka thënë ajo gjatë një paraqitje para mediave në Bruksel.

Ajo shtoi se “se të dyja vendet kanë bërë përmirësime në shumë drejtime, në luftën kundër krimit dhe korrupsionit dhe natyrisht KE-ja ka monitoruar me kujdes të gjitha përpjekjet”. Malstrom tha gjithashtu se të dyja vendet duhet të luftojnë krimin e organizuar.

E pyetur për Kosovën, ajo tha se ka një plan për këtë vend, por plani sipas saj, është ende në përgatitje e sipër.
E pyetur për datën e aplikimit të liberalizimit të vizave, Malstrom tha se gjatë verës do të ketë një grup monitorues, i cili gjatë vjeshtës do të japë vlerësimet, por nuk ka premtuar asnjë datë të saktë.

 

< Paraprake		Pasuese >