Qeveria belge paralajmëron që shumë shpejt do t’i kthej të gjithë azilkërkuesit shtetas të Serbisë, të cilët pas liberalizimit të vizave kërkuan strehim në Mbretërinë e Belgjikës. Vetëm gjatë muajit shkurt, 330 qytetarë nga Lugina e Preshevës kërkuan azil politik në këtë shtet. Thuhet se ata janë kryesisht shqiptarë dhe romë.

Ambasadorja e këtij shteti në Beograd, Deniz de Ove, në një intervistë për Radion Evropa e Lirë, deklaroi se qysh nga e mërkura 10 mars, do të kthehen autobusët me azilkërkuesit politik.

Refuzimi i kërkesave të tyre për azil, sipas ambasadores belge, është bërë për shkak të situatës së qetë në jug të Serbisë, ku nuk mbretëron gjendje lufte, dhe nuk ka më konflikte ndër-etnike. Vetë autoritetet belge do të bartin shpenzimet e kthimit të emigrantëve, të përcjell nga zyra për të huajt e këtij shteti. Diplomatja Deniz de Ove, sqaroi se nuk ekziston kategoria e azilit ekonomi, siç aludohet në opinion.

< Paraprake		Pasuese >