Situata e përmbytjeve në veri të Shqipërisë raportohet të jetë sërisht e rënduar. Mediat shqiptare njoftojnë se zona me e ekspozuar dhe që rrezikon më shumë mbetet ajo e Nënshkodres, ku edhe argjinaturat, në një pjesë të mirë të tyre janë të dëmtuara dhe ende te pariparuara nga permbytja e muajit te kaluar.

Ministri i Bujqësise Genc Ruli ka siguruar banorët se strukturat e emergjencës janë në gatishmëri për të evakuuar ata dhe gjënë e gjallë në rast se kjo do jete e nevojshme.

Ndërkohë prurjet në kaskadën e Drinit kanë detyruar Korporaten Elektroenergjetike Shqiptare të hapë portat e shkarkimit në Liqenin e Fierzës dhe shkarkojë ujin në Hidrocentralin e Komanit. Sipas KESH-it, gjatë ditës së sotme në Fierzë, niveli i shkarkimit ka qenë 550 metra kub ujë për sekondë, ndërkohë që prurjet kanë arritur në 900 metra kub në sekondë. Niveli i ujit në këtë liqen gjatë mesditës së djeshme është në nivelin maksimal të lejuar.

< Paraprake		Pasuese >