Ekipet shpëtimtare ende janë duke punuar në vendin e ngjarjes ku në orët e mëngjesit të së hënës u përplasën dy trena, ku si pasojë humbën jetën 18 persona derisa 11 të tjerë janë në gjendje kritike.

Aksidenti ka ndodhur në fshatin Buizinger, 15km në jug-perëndim të kryeqytetit Bruksel. Disa udhëtarë kanë mbetur të bllokuar brënda vagonëve me orë të tëra, bënë të ditur mediat lokale.

Kryeministri belg Iv Leterne, i cili sapo kishte arritur në vizitë zyrtare në Kosovë, është kthyer të hënën menjëherë për në vendlindje. Arsye e kthimit të tij urgjent, me të arritur në Aeroportin e Prishtinës, ishte kjo fatkeqësi.

Informatat fillestare jepnin numrin e 20 të vdekur, por spitali në qytetin Buizingen konfirmoi 11 të vdekur dhe 15 të lënduar, prej të cilëve 11 në gjendje të rëndë. Operatori i trenit SNCB, thotë se është shumë herët të spekulohet për shkaqet e aksidentit.

Zyrtarët bënë të ditur se në momentin e aksidentit në të dy trenat gjendeshin 250 deri 300 udhëtarë. Shkak i aksidentit besohet se mund të jetë bora e madhe që ditëve të fundit i kishte ndërprerë lidhjet hekurudhore brenda dhe jashtë Brukselit. Një numër i madh i shërbimeve, përfshirë edhe relacionet ndërkombëtare janë anuluar për ditën e hënë.

< Paraprake		Pasuese >