Pekini zyrtar i bëri thirrje Presidentit amerikan Barack Obama të mos takojë Dalai Lamën gjatë javës tjetër.

Kjo kërkesë erdhi të premten nga Ministria e Jashtme në Pekin, e cila nëpërmjet një kumtese zyrtare paralajmëroi Uashingtonin se realizimi i një takimi në mes Obamës dhe Lamas do të ftohë marrëdhëniet amerikano-kineze.

Ministria e Jashtme e vendit komunist bëri të ditur se Shtetet e Bashkuara nuk duhet të ndërhyjnë në punët e brendshme të Pekinit dhe njëkohësisht të destabilizojë rajonin kinez të Tibetit.

Takimi i Obamës me Laman është paralajmëruar për 18 shkurt. Ndryshe, liderin shpirtëror tibetian e pati takuar edhe ish Presidenti George W. Bush, gjë kjo që shkaktoi reagime të ashpra në Pekinin zyrtar.

Dy superfuqitë po kalojnë në një periudhë problematike. Uashingtoni dhe Pekini u ndeshën edhe për shitjen e armëve amerikane në Tajvan dhe çështjen e gjigantit të internetit Google, që u largua nga Kina.

< Paraprake		Pasuese >